Deputetja e LDK-së, Hykmete Bajrami, ka kritikuar ashpër Qeverinë në detyrë për mënyrën se si po zhvillohen mbledhjet elektronike, të cilat sipas saj po mbahen edhe gjatë natës kur bëhet fjalë për ndarjen e mjeteve për interesa politike dhe partiake. Ajo thekson se ndërkohë që vendimet për "dosta" merren shpejt dhe në terr, fermerët e dëmtuar nga breshëri që kanë humbur prodhimet dhe të ardhurat e një viti të tërë, nuk janë kompensuar ende. Bajrami i bën thirrje qeverisë të analizojë me kujdes mënyrën e ndarjes së parasë publike dhe shpreh shqetësimin se fermerët po mbeten në pritje pa asnjë vendim konkret. Sipas saj, kjo tregon një mungesë përkushtimi ndaj qytetarëve që punojnë për të siguruar ushqimin, ndërsa për interesa politike buxheti gjendet menjëherë.