Deputeti Halil Snopçe nga Aleanca për Shqiptarët theksoi se balancuesi aktual nuk përmban mekanizma efektivë për të parandaluar keqpërdorimet në deklarimin e përkatësisë etnike, ku shqiptarët mund të deklarohen si maqedonas dhe anasjelltas. Ai shtoi se as ligji i ri për përfaqësim të drejtë dhe adekuat nuk do të arrijë të eliminojë këto probleme, pasi nuk adreson thelbin e keqpërdorimeve. Snopçe përmendi edhe Komisionin e Venecias, i cili ka vënë në dukje se ligji nuk shmang keqpërdorimet dhe ka rekomandime që nuk janë zbatuar. Sipas tij, është e nevojshme të krijohen mekanizma realë për zbatimin e ligjit dhe të ruhet balanca mes meritokracisë dhe përfaqësimit të drejtë, duke shmangur deklarimet e manipuluara të përkatësisë etnike.