Ministri në detyrë për Punë, Familje dhe Vlerat e Luftës Çlirimtare, Andin Hoti, ka theksuar rëndësinë e projektit për banim social adekuat në Kosovë, duke e cilësuar atë si një politikë sociale që ndikon drejtpërdrejt në mirëqenien dhe dinjitetin e familjeve. Ai ka shpjeguar se banimi social nuk është vetëm ndërtim i objekteve, por një investim në sigurinë sociale dhe përfshirjen e kategorive të cenueshme si familjet me gjendje të pafavorshme ekonomike, të papunët, viktimat e dhunës dhe të rinjtë. Hoti ka theksuar lidhjen e ngushtë mes banimit social dhe punësimit, duke theksuar se për të dalë nga varfëria nuk mjafton vetëm një pagesë mujore, por nevojitet edhe një shtëpi e sigurt dhe mundësi reale për punë. Ai ka njoftuar gjithashtu për reformën e asistencës sociale që pritet të përfundojë në qershor të vitit të ardhshëm, e cila synon të mbështesë familjet gjatë periudhës së aftësimit profesional dhe krijimit të mundësive për punësim.