Ministrja në detyrë e Mjedisit dhe Planifikimit Hapësinor, Fitore Pacolli, së bashku me nënkryetaren e Kuvendit, Emilia Rexhepi, takuan banorët e fshatrave pranë rrugës Prizren-Prevallë, të cilët kundërshtojnë vendosjen e rampës në këtë rrugë rajonale. Banorët i dorëzuan ministres një peticion me nënshkrime, duke kërkuar që rampat të vendosen jashtë rrugës kryesore për të siguruar lëvizje të lirë dhe pa barrikada. Kryetari i Bashkësisë Lokale, Allmir Bajrami, theksoi se nuk janë kundër rampave, por kundër vendosjes së tyre në magjistrale. Ministrja Pacolli u shpreh se qëllimi i takimit ishte diskutimi i shqetësimeve për të gjetur një zgjidhje të drejtë dhe se asnjë vendim nuk do të merret pa dialog me banorët dhe palët e interesit, duke kërkuar nga banorët vetëpërmbajtje gjatë procesit.