Kuvendi i Republikës së Kosovës organizon ditën e dytë të aktivitetit tradicional “Bashkatdhetarët në Kuvend”, dedikuar bashkatdhetarëve që qëndrojnë në Kosovë gjatë sezonit veror. Gjatë këtij eventi, i cili zhvillohet në ambientet e Kuvendit nga ora 12:00 deri në 16:00, pjesëmarrësit kanë mundësinë të vizitojnë institucionin më të lartë ligjvënës dhe të njihen me funksionimin dhe rolin e tij. Aktiviteti ofron gjithashtu mundësi për bashkëbisedime mbi marrëdhëniet ndërmjet institucioneve dhe diasporës, duke forcuar lidhjet mes tyre. Ky event është kthyer në një traditë vjetore që synon afrimin e bashkatdhetarëve me institucionet e Republikës së Kosovës dhe thellimin e bashkëpunimit.