Ministri i Financave, Punës dhe Transfereve, Andin Hoti, dhe ministri i Administrimit të Pushtetit Lokal, Elbert Krasniqi, zhvilluan një takim për të forcuar bashkëpunimin ndërmjet nivelit qendror dhe atij lokal në fushën e punësimit dhe aftësimit profesional. Ata diskutuan mënyrat për të afruar më shumë shërbimet e Agjencisë së Punësimit të Kosovës te qytetarët nëpër komunat e ndryshme, duke përfshirë ndërmjetësimin në punësim, orientimin në karrierë dhe programet e aftësimit profesional. Një vëmendje e veçantë iu kushtua rritjes së përfshirjes së pjesëtarëve të komuniteteve në tregun e punës dhe koordinimit me komunat për adresimin e nevojave konkrete për punësim. Synimi kryesor i këtij bashkëpunimi është që mundësitë dhe shërbimet e krijuara në nivel qendror të jenë sa më të qasshme për të gjithë qytetarët në të gjitha komunat e Kosovës.