Ministri në detyrë i Mbrojtjes, Ejup Maqedonci, dhe drejtori i Agjencisë për Mbrojtjen e Informacionit të Klasifikuar (AMIK), Emin Hoxhaj, kanë nënshkruar një Marrëveshje Bashkëpunimi mes Ministrisë së Mbrojtjes dhe AMIK-ut. Kjo marrëveshje ka për qëllim forcimin e bashkëpunimit institucional në mbrojtjen e informacionit të klasifikuar dhe avancimin e kapaciteteve në fushën e sigurisë kombëtare. Në kuadër të saj do të krijohet një kornizë e qëndrueshme për koordinim institucional, shkëmbim praktikash profesionale, organizim trajnimesh të përbashkëta, si dhe mbështetje teknike dhe profesionale. Bashkëpunimi do të përfshijë gjithashtu trajtimin e çështjeve që lidhen me sigurinë e informacionit të klasifikuar, duke synuar rritjen e efikasitetit dhe sigurisë në këtë fushë.