Zëvendësministri i Punëve të Brendshme i Maqedonisë së Veriut, Astrit Iseni, zhvilloi një vizitë zyrtare në Kosovë, ku u prit nga ministri Xhelal Sveçla dhe zëvendësministri Enver Dugolli. Gjatë takimit u theksua bashkëpunimi i ngushtë mes dy ministrive të brendshme, me fokus në sfidat e sigurisë, menaxhimin e kufijve dhe lehtësirat për banorët përgjatë vijës kufitare. Iseni dhe Dugolli vizituan Qendrën Kombëtare të Menaxhimit të Kufirit dhe Akademinë e Kosovës për Siguri Publike, ku u njohën me procedurat dhe programet trajnuese për zyrtarët e sigurisë. Në përfundim, u riafirmua angazhimi i përbashkët për luftën kundër krimit të organizuar dhe forcimin e stabilitetit dhe sigurisë në të dy vendet.