Komandanti i Forcës së Sigurisë së Kosovës, gjenerallejtënant Bashkim Jashari, priti në takim rreshter-majorin Komandues të Gardës Nacionale të Ajovës, Matthew T. Strasser, ku u diskutua për bashkëpunimin e shkëlqyer ndërmjet dy forcave, me theks të veçantë në zhvillimin dhe avancimin e trupës së nënoficerëve brenda FSK-së. Jashari vlerësoi kontributin e partnerëve amerikanë, veçanërisht Gardën Nacionale të Ajovës, në ndërtimin e një strukture profesionale të nënoficerëve, duke theksuar rëndësinë e këtij bashkëpunimi për forcimin e kapaciteteve të FSK-së. Nga ana e tij, Strasser falenderoi lidershipin e Jasharit për mbështetjen e zhvillimit të karrierës ushtarake të personelit të FSK-së dhe përkushtimin ndaj korit të nënoficerëve, duke e konsideruar këtë shtyllën kryesore të forcës. Në përmbyllje të takimit, gjenerallejtënant Jashari dekoroi rreshter-majorin Strasser me medaljen “Shërbim Vetëmohues” për mbështetjen e vazhdueshme ndaj Forcës së Sigurisë së Kosovës.