Drejtori i Përgjithshëm i Shërbimit Korrektues të Kosovës, Ismail Dibrani, zhvilloi një takim lamtumirës me atasheun e ICITAP në Ambasadën e SHBA-së, Kimberly Riffe, ku falënderoi për përkushtimin dhe mbështetjen e vazhdueshme të këtij programi. Ky bashkëpunim ka ndikuar në ndërtimin e kapaciteteve profesionale, themelimin e Departamentit të Inteligjencës, forcimin e sigurisë dhe avancimin e standardeve në institucionet korrektuese të Kosovës. Përpjekjet e përbashkëta janë vlerësuar edhe me Çmimin Ndërkombëtar të Ekselencës nga Shoqata Ndërkombëtare e Korrektimeve dhe Burgjeve, duke theksuar rëndësinë e anëtarësimit në shoqatat ndërkombëtare për shkëmbimin e praktikave më të mira. Në përmbyllje, Dibrani shprehu mirënjohje për mbështetjen e Qeverisë së SHBA-së dhe theksoi përkushtimin për të vazhduar avancimin dhe për të qenë model suksesi në rajon dhe më gjerë.