Kryenegociatori i Kosovës për Bashkimin Evropian, Jeton Zulfaj, zhvilloi një takim me Shefen e UNICEF-it në Kosovë, Veronika Vashchenko, ku u diskutua për zbatimin e Agjendës së Reformave me fokus në zhvillimin e kapitalit njerëzor dhe edukimin në fëmijërinë e hershme. Gjatë bisedimeve u vlerësua roli i UNICEF-it në promovimin e qasjes së barabartë dhe sigurimin e cilësisë në institucionet arsimore për fëmijët e vegjël. Zulfaj shprehu mirënjohje për mbështetjen e vazhdueshme të UNICEF-it dhe theksoi përkushtimin e Qeverisë së Kosovës për të avancuar politikat në interes të fëmijëve. Palët diskutuan gjithashtu bashkëpunimin në projekte që synojnë mbrojtjen e të drejtave dhe mirëqenies së fëmijëve në vend.