Drejtori i Përgjithshëm i Shërbimit Korrektues të Kosovës, Ismail Dibrani, zhvilloi një takim me drejtuesit e Zyrës së Këshillit të Evropës në Prishtinë, ku u diskutua për bashkëpunimin dhe avancimin e sistemit korrektues në vend. Ky partneritet ka sjellë rezultate të rëndësishme në fuqizimin e kapaciteteve profesionale, rehabilitimin dhe riintegrimin e të burgosurve, si dhe në respektimin e të drejtave të njeriut. Dibrani theksoi rëndësinë e këtyre takimeve për vlerësimin e progresit dhe përcaktimin e hapave të ardhshëm drejt standardeve më të larta evropiane. Ai gjithashtu shprehu mirënjohje për mbështetjen e vazhdueshme të Këshillit të Evropës dhe konfirmoi angazhimin për ndërtimin e një sistemi korrektues modern dhe të bazuar në dinjitetin njerëzor.