Komandanti i Forcës së Sigurisë së Kosovës, gjeneral Bashkim Jashari, mori pjesë në ceremoninë e ndërrimit të komandantit të Ushtrisë Amerikane për Evropë dhe Afrikë (USAREUR-AF), ku u takua me gjeneralët amerikanë, përfshirë gjeneralin Christopher T. Donahue dhe zëvendëskomandantin Christopher Norrie. Gjatë këtij takimi, u theksua rëndësia e bashkëpunimit të ngushtë dhe mbështetjes së vazhdueshme amerikane në zhvillimin e kapaciteteve të FSK-së, si dhe në avancimin e bashkëpunimit ndërmjet forcave. Gjenerali Donahue falënderoi gjeneral Jasharin për bashkëpunimin e suksesshëm dhe theksoi zgjerimin e aktiviteteve të përbashkëta, duke përfshirë trajnimet dhe ushtrimet që forcojnë ndërveprimin dhe partneritetin. Në përmbyllje, palët rikonfirmuan përkushtimin për avancimin e bashkëpunimit strategjik, duke theksuar rëndësinë e këtij partneriteti për sigurinë, stabilitetin dhe paqen në Kosovë dhe rajon.