Komandanti i Forcës së Sigurisë së Kosovës, Gjenerallejtënant Bashkim Jashari, priti në takim mirëseardhës Nënkolonelen Denise McMahon, Atasheun e Mbrojtjes së Mbretërisë së Bashkuar në Kosovë. Gjatë takimit u diskutua për arritjet e deritanishme të FSK-së dhe objektivat për zhvillimin e forcës, duke përfshirë planet bilaterale për trajnime, stërvitje, pajisje dhe aktivitete të përbashkëta. McMahon përgëzoi profesionalizmin e lartë të personelit të FSK-së dhe shprehu gatishmërinë për të thelluar bashkëpunimin ushtarak ndërmjet dy vendeve. Në përfundim, u dakordua që marrëdhëniet bilaterale të vazhdojnë të zhvillohen me fokus në forcimin e kapaciteteve ushtarake të FSK-së për realizimin e misionit të saj.