Bashkia e Tiranës ndodhet në një situatë të pazakontë, pasi kryetari i saj në letër, Erion Veliaj, është në paraburgim dhe nuk mund të ushtrojë funksionet e tij drejtuese. Nënkryetarja Anuela Ristani, e cila kishte marrë kompetenca për të drejtuar bashkinë që nga shkurt 2025, i janë hequr ato me një urdhër të firmosur nga vetë Veliaj, por pa caktuar një zëvendësues apo drejtues të ri. Kjo ka krijuar një boshllëk në zinxhirin e komandës dhe ka lënë pa përgjegjësi institucionin më të madh bashkiak në vend, pasi asnjë nga drejtuesit aktualë nuk ka autoritet ligjor për të marrë vendime që kërkojnë firmën e kryetarit. Situata ngre pyetje serioze mbi mënyrën se si po funksionon administrata e Tiranës dhe kush po merr vendimet e përditshme në mungesë të një drejtuesi të qartë.