Bashkimi Demokratik për Integrim (BDI) shprehu shqetësim të thellë ndaj deklaratave dhe veprimeve të Ministrit të Drejtësisë, Igor Fillkovi, duke e akuzuar atë se po barazon gjuhën shqipe “me zero” në institucionet e shtetit. Sipas BDI-së, përpjekja për të përjashtuar shqipen nga provimi i jurisprudencës dhe për ta minuar përdorimin e saj përbën shkelje të Ligjit për përdorimin e gjuhëve dhe goditje ndaj Marrëveshjes së Ohrit dhe rendit kushtetues të vendit. BDI thekson se gjuha shqipe është kategori kushtetuese dhe ligjore, themel i barazisë në një shtet multietnik, dhe çdo tentativë për ta zbehur ose përjashtuar atë është regres. Partia gjithashtu shpreh shqetësim për heshtjen e koalicionit VLEN, i cili sipas tyre nuk po mbron të drejtat e qytetarëve shqiptarë dhe po bëhet spektator ndaj kësaj tendence. BDI paralajmëron se barazia gjuhësore nuk negocionohet dhe se çdo veprim përkundër kësaj do të hasë në kundërshtimin e tyre institucional dhe politik.