Zyra e Bashkimit Evropian në Kosovë, vendet e QUINT-it dhe EULEX-i i kanë dërguar një letër institucioneve të Kosovës, duke kërkuar miratimin e legjislacionit sekondar që qartëson përdorimin e simboleve dhe flamujve të komuniteteve. Sipas tyre, Kushtetuta e Kosovës garanton të drejtën e komuniteteve për të shprehur identitetin e tyre përmes simboleve, por mungesa e akteve nënligjore krijon paqartësi dhe rrezik për zbatim jo të njëtrajtshëm apo diskriminues. Letra i është adresuar ministrave në detyrë të Administrimit të Pushtetit Lokal dhe Punëve të Brendshme, si dhe autoriteteve të tjera relevante, duke kërkuar që ky proces të zhvillohet në konsultim me komunitetet joshumicë dhe partnerët ndërkombëtarë. Deri në miratimin e legjislacionit, përdorimi i flamujve duhet të trajtohet në përputhje me Kushtetutën dhe ligjet në fuqi, në mënyrë të drejtë dhe pa diskriminim.