Masat ndëshkuese të Bashkimit Evropian ndaj Kosovës, të vendosura në qershor të vitit 2023 për shkak të tensioneve në veri, nuk janë hequr ende, pavarësisht paralajmërimeve për vendim deri në fund të janarit 2026. Deri në fund të dhjetorit të vitit të kaluar, BE-ja kishte lehtësuar masat përgjysmë, por as Brukseli dhe as Zyra e BE-së në Kosovë nuk kanë dhënë informacion të qartë për hapat e mëtejshëm. Përfaqësues të Odës Ekonomike theksojnë se dëmi financiar për Kosovën nga këto masa arrin në rreth 400 milionë euro, duke përfshirë humbje në grante dhe kredi të buta, si dhe dëmtim të imazhit për investitorët e huaj. Në Institutin për Studime Evropiane mendojnë se heqja e masave mund të lidhet me zgjidhjen e çështjes së presidentit të Kosovës, pasi BE-ja po i shqyrton me kujdes zhvillimet politike para se të marrë një vendim përfundimtar.