Bashkimi Evropian pritet që më 2 mars 2026 të heqë të gjitha masat ndëshkuese ndaj Kosovës, të vendosura në qershor të vitit 2023 si reagim ndaj veprimeve të njëanshme të autoriteteve kosovare që rritën tensionet në veri të vendit. Vendimi është marrë nga Komisioni Evropian dhe do të miratohet nga vendet anëtare në takimin e Grupit punues për Ballkanin Perëndimor në Bruksel. Më parë, në fund të vitit 2025, BE-ja kishte hequr masat për rreth 50% të asistencës financiare, ndërsa tani do të lirohen edhe 205 milionë euro nga Programet e Paraanëtarësimit dhe Fondi i Investimeve për Ballkanin Perëndimor. Përveç masave financiare, do të hiqen edhe kufizimet politike, duke përfshirë refuzimin e takimeve në nivel të lartë me përfaqësuesit e Qeverisë së Kosovës.