Bashkimi Evropian i ka bërë thirrje institucioneve të Kosovës të ndalojnë rrënimet e mëtejshme të objekteve në zonën e Liqenit të Ujmanit, duke theksuar se pretendimet pronësore janë ende në shqyrtim gjyqësor. Zëdhënësja e BE-së për politikë të jashtme, Anitta Hipper, shprehu keqardhje për rrënimin e shtëpive dhe kërkoi që çdo veprim i pakthyeshëm të pezullohet deri në vendimin përfundimtar të gjykatës. BE-ja u bëri thirrje autoriteteve të Kosovës të punojnë me banorët e prekur dhe autoritetet lokale për të gjetur zgjidhje ligjore dhe të qëndrueshme. Kjo kërkesë vjen në një moment kur situata në Ujman është tensionuar për shkak të demolimeve në pronën e ndërmarrjes publike “Ibër-Lepenc” në Zubin Potok.