Bashkimi Evropian ka bërë thirrje për përshpejtimin e procesit të konstituimit të institucioneve në Kosovë, duke theksuar rëndësinë e respektimit të Kushtetutës dhe vendimeve të Gjykatës Kushtetuese. BE-ja nënvizon se formimi i institucioneve do t’i mundësonte Kosovës të përfitonte plotësisht nga mundësitë e rrugës drejt anëtarësimit në Bashkimin Evropian, përfshirë edhe ato të Planit të Rritjes për Ballkanin Perëndimor. Në këtë kontekst, Bashkimi Evropian kërkon dialog efikas dhe konstruktiv ndërmjet partive politike, si dhe një qëllim të përbashkët për të avancuar objektivat dhe për të zbatuar reformat e nevojshme. Deklarata e BE-së vjen në një moment kur procesi i formimit të institucioneve mbetet një çështje kyçe në zhvillimet politike të Kosovës.