Zyra e Bashkimit Evropian në Kosovë, përmes ushtrueses së detyrës së shefes Eva Palatova, i ka dërguar një letër kryetares së Kuvendit, Albulena Haxhiu, duke shprehur shqetësime lidhur me emërimet e reja në Komisionin për Provimin e Jurisprudencës. BE thekson se vendimi i Qeverisë për të ndërprerë para kohe mandatin e anëtarëve aktualë ngre dilema për kushtetutshmërinë dhe ligjshmërinë e këtij veprimi, duke vënë në pikëpyetje pavarësinë dhe paanshmërinë e sistemit të drejtësisë. Në letrën zyrtare, BE i bën thirrje Kuvendit që të ushtrojë mbikëqyrje të kujdesshme dhe të sigurojë që çdo emërim të jetë transparent, i bazuar në meritë dhe në përputhje me standardet evropiane. Zyra e BE-së riafirmon gatishmërinë për dialog dhe mbështetje në forcimin e sundimit të ligjit dhe institucioneve demokratike në Kosovë.