Presidenti i Shqipërisë, Bajram Begaj, gjatë një takimi me ambasadorin e ri të Ekuadorit, Esteban Assar Moscoso Bohman, i ka kërkuar këtij të fundit që vendi i tij të shqyrtojë mundësinë e njohjes së Republikës së Kosovës. Në ceremoni zyrtare në Presidencën e Shqipërisë, Begaj shprehu gatishmërinë për forcimin e marrëdhënieve dypalëshe dhe bashkëpunimin në fusha me interes të përbashkët mes dy vendeve. Ai vlerësoi bashkëpunimin në organizata ndërkombëtare dhe theksoi rëndësinë e mbështetjes së Ekuadorit për Kosovën, duke e konsideruar njohjen e saj si një kontribut për paqen dhe stabilitetin në Ballkanin Perëndimor. Shqipëria vazhdon të lobojë për anëtarësimin e Kosovës në organizata ndërkombëtare dhe për njohjen e saj nga vendet që ende nuk e kanë bërë këtë hap.