Petar Petkoviq, drejtor i Zyrës për Kosovën në Qeverinë e Serbisë, ka dalë në mbrojtje të Milan Radoiçiqit, të cilin autoritetet e Kosovës e konsiderojnë organizatorin kryesor të sulmit terrorist në Banjskë më 24 shtator 2023. Petkoviq e ka cilësuar si “të ulët dhe të turpshme” akuzën ndaj Radoiçiqit dhe ka hedhur përgjegjësinë te kryeministri në detyrë i Kosovës, Albin Kurti. Ai gjithashtu ka kritikuar politikanin opozitar serb Miroslav Aleksiq, duke thënë se një patriot serb nuk e dëbon popullin e vet, por lufton për të me zemër dhe shpirt. Ndërkohë, Radoiçiq ka pranuar vetë organizimin e sulmit, por vazhdon të jetë i lirë në Serbi pa u ndjekur penalisht, ndërsa bashkësia ndërkombëtare, përfshirë NATO-n, kërkon nga Serbia që ta sjellë atë para drejtësisë.