Sali Berisha, kryetari i Partisë Demokratike, ka thirrur për sot në orën 18:00 një protestë kombëtare në Tiranë, me kërkesën kryesore për largimin e kryeministrit Edi Rama, formimin e një qeverie teknike dhe zhvillimin e zgjedhjeve të lira dhe të ndershme. Protesta zhvillohet në një ditë simbolike për demokratët, 22 marsin, që shënon fitoren e parë pluraliste të PD-së në 1992, por përkon edhe me festën e komunitetit bektashi, Sulltan Novruzi. Berisha e ka quajtur këtë tubim “kryengritjen më të madhe paqësore” të opozitës dhe ka bërë thirrje që të gjithë shqiptarët, pavarësisht bindjeve politike, të marrin pjesë për të treguar forcën e tyre në rrugët e kryeqytetit. Megjithëse skenarët e protestës nuk janë sqaruar plotësisht, ajo do të nisë para kryeministrisë në bulevardin Dëshmorët e Kombit, ndërsa opozita ka paralajmëruar vazhdimin e rezistencës deri në largimin e Ramës dhe ndryshimin demokratik në vend.