Ka nisur protesta e pestë kombëtare e Partisë Demokratike dhe forcave të tjera opozitare kundër qeverisë së kryeministrit Edi Rama. Kreu i PD-së, Sali Berisha, është nisur drejt kryeministrisë për t’u bashkuar me protestuesit, duke bërë thirrje për një kryengritje paqësore që nuk do të ndalet deri në largimin e Ramës. Protesta zhvillohet në Bulevardin Dëshmorët e Kombit pa fjalime politike dhe pa skenë, duke i dhënë më shumë hapësirë qytetarëve dhe një skenari të qartë marshimi. Pas qëndrimit rreth 30 minuta para kryeministrisë, turma marshon drejt Drejtorisë së Policisë, ku protestuesit brohorasin “Rama ik” dhe kërkojnë dorëheqjen e kryeministrit dhe ngritjen e një qeverie teknike për zgjedhje të lira dhe të ndershme.