Liderët e Lëvizjes Vetëvendosje dhe Lidhjes Demokratike të Kosovës, Albin Kurti dhe Lumir Abdixhiku, kanë zhvilluar një takim të gjatë ku kanë diskutuar për herë të parë emra konkretë për presidentin e ardhshëm të Kosovës. Ky zhvillim tregon se bisedimet mes dy partive kanë hyrë në një fazë më konkrete dhe përfundimtare, duke lënë pas diskutimet vetëm për kriteret dhe profilin e kandidatit. Analisti Ibrahim Shala vlerëson se procesi po ecën drejt përfundimit dhe shprehet i bindur se bashkëbisedimi do të sjellë një marrëveshje për zgjedhjen e presidentit, e cila është thelbësore për tejkalimin e krizës institucionale në vend. Liderët kanë konfirmuar se do të vazhdojnë bisedimet, ndërsa nuk do të bëjnë publike emrat deri në arritjen e një dakordësie përfundimtare.