Deputetja e PDK-së, Blerta Deliu – Kodra, ka sulmuar ashpër kryeministrin Albin Kurti gjatë një debati në Kuvend lidhur me çmimin e naftës në Kosovë. Ajo e ka quajtur Kurtin “mashtrues të madh” dhe e ka akuzuar për paaftësi në qeverisje, duke i rikujtuar një postim të tij nga viti 2018 ku premtonte çmime më të ulëta të naftës për fermerët dhe traktorët, ndërsa sot çmimi ka arritur në dy euro për litër. Deliu-Kodra e ka kritikuar Kurtin për propagandë dhe përpjekje për të shndërruar vendin në diktaturë, duke e akuzuar se po tenton ta dërgojë Kosovën në zgjedhje për shkak të paaftësisë së tij. Ajo ka reaguar edhe ndaj nënkryetarit të Kuvendit, Ardian Gola, duke kërkuar që t’i lejohet të flasë pa ndërprerje gjatë debatit.