Kryenegociatori i Kosovës me Bashkimin Evropian, Jeton Zulfaj, njoftoi se Kosova ka dorëzuar brenda afatit kërkesën e parë për lirimin e fondeve nga Instrumenti për Reforma dhe Rritje të BE-së, duke përfshirë reformat e përfunduara deri më 30 qershor. Megjithatë, në kërkesë nuk janë përfshirë gjashtë hapa reformues, pesë prej të cilëve kërkonin miratim parlamentar, të cilët nuk u realizuan për shkak të bllokadës në Kuvend. Zulfaj theksoi se mosfunksionimi i Kuvendit ka ngadalësuar reformat dhe ka rrezikuar fondet evropiane të dedikuara për zhvillimin dhe integrimin e Kosovës në BE. Ai shtoi se nëse nuk do të kishte pasur këtë bllokadë, Kosova do të printe në rajon në përmbushjen e reformave, ndërsa hapat e papërfunduar do t’i procedohen legjislaturës së re të Kuvendit sapo të konstituohet.