Kryenegociatori i Kosovës me Bashkimin Evropian, Jeton Zulfaj, ka njoftuar se Kosova rrezikon të humbasë mbi 40 milionë euro nga Plani i Rritjes për shkak të moszbatimit në kohë të reformave të kërkuara nga BE-ja. Ai theksoi se problemi kryesor është bllokada në Kuvend, ku pesë ligje dhe një strategji e rëndësishme nuk janë miratuar për shkak të mungesës së funksionimit të institucioneve. Zulfaj shtoi se reformat e papërmbushura do të realizohen sapo të krijohen institucionet e reja, por vonesat kanë ndikuar në humbjen e fondeve që janë për Republikën e Kosovës dhe jo për qeverinë në detyrë. Ai gjithashtu bëri të ditur se më 15 korrik do të dërgohet kërkesa për lirimin e fondeve mbi 100 milionë euro dhe se Komisioni Evropian do të ketë 90 ditë për vlerësim, ndërsa procesi i integrimit evropian vazhdon me përgatitjen e përgjigjeve për pyetësorin e BE-së.