Kreu i Këshillit Kombëtar Shqiptar në Luginë të Preshevës, Enkel Rexhepi, njoftoi se qeveria serbe ka bllokuar transferet dhe donacionet nga Kosova, të destinuara për zhvillimin dhe ruajtjen e identitetit kombëtar në këtë zonë. Sipas Rexhepit, pas këtij bllokimi qëndron Demo Berisha, i cili ka pranuar në një deklaratë zyrtare se pengesa nuk lidhet me dokumentacionin apo keqpërdorimin e fondeve, por me faktin që ato vijnë nga institucionet e Kosovës. Qeveria e Republikës së Kosovës dënoi ashpër këtë veprim, duke e cilësuar si ndërhyrje të papranueshme dhe një model të përsëritur bllokimi institucional ndaj Këshillit Kombëtar Shqiptar. Për të kundërshtuar këtë praktikë, Kosova ka njoftuar Bashkimin Evropian dhe faktorët ndërkombëtarë, duke u angazhuar për mbrojtjen e të drejtave të shqiptarëve në Luginën e Preshevës dhe Sanxhakun.