Përfaqësuesja e Britanisë së Madhe në Këshillin e Sigurimit të OKB-së ka bërë thirrje që sa më shumë shtete anëtare të njohin Kosovën si shtet, duke theksuar se kjo është thelbësore për stabilitetin afatgjatë në rajon. Ajo ka vlerësuar procesin e zgjedhjeve në Kosovë dhe zbatimin e Ligjit për të huajt si hapa konstruktivë, ndërsa ka kërkuar nga Serbia që të ulë tensionet dhe të sjellë para drejtësisë përgjegjësit e sulmit terrorist në Banjska, përfshirë Milan Radoiçiqin. Përfaqësuesja britanike ka theksuar gjithashtu nevojën për zbatimin e marrëveshjeve ekzistuese mes Kosovës dhe Serbisë dhe për zgjidhjen e mospajtimeve përmes dialogut të BE-së. Ajo ka kërkuar llogaridhënie edhe ndaj KFOR-it dhe Policisë së Kosovës lidhur me ngjarjet e majit 2023, duke përsëritur thirrjen për drejtësi dhe përgjegjësi në këtë çështje.