Ministrja e Financave, Gordana Dimitrievska Koçoska, ka theksuar se punësimet në Klinikën e Fëmijëve duhet të jenë në përputhje me kufizimet buxhetore dhe nuk mund të miratohen të gjitha kërkesat për kontrata të reja. Ajo sqaroi se pëlqimet për punësim nuk lidhen me mjekët dhe infermierët, por kryesisht me personelin teknik, dhe se buxheti duhet të harmonizohet me obligimet financiare të krijuara nga punësimet e mëparshme. Ish të punësuarit në klinikë reaguan duke kërkuar që institucionet kompetente të gjejnë një zgjidhje të përbashkët, duke theksuar se ata nuk janë përgjegjës për vendimet administrative, por kanë kontribuar në funksionimin normal të institucionit. Situata mbetet e paqartë, ndërsa kontratat e 50 ish-punësuarve nuk janë vazhduar dhe ata presin një sinjal pozitiv nga autoritetet.