Në prag të festës së Kurban Bajramit, qytetarët në Kosovë kanë nisur përgatitjet për festë duke blerë produkte ushqimore, por shumë prej tyre ankohen për çmime të larta dhe të vështira për t’u përballuar. Tregtarët shpjegojnë se rritja e çmimeve lidhet me kostot e furnizimit nga jashtë dhe mungesën e prodhimit vendor, ndërsa disa qytetarë vërejnë se toka bujqësore të papunuar ndikojnë në këtë situatë. Autoriteti Kosovar i Konkurrencës është aktivizuar për të monitoruar lëvizjet e çmimeve dhe po përgatit një analizë të shportës bazike ushqimore, duke paralajmëruar masa dhe gjoba për shkelësit. Gjatë periudhave festive, ndërmarrjet shpesh aplikojnë oferta promovuese dhe zbritje për të tërhequr konsumatorët, por shqetësimet për çmimet mbeten të pranishme.