Në një takim të zhvilluar në Trebovic të Pejës, Daut Haradinaj, kandidati dhe nënkryetari i Aleancës për Ardhmërinë e Kosovës, u prit nga një numër i madh qytetarësh të cilët po i bashkohen gjithnjë e më shumë këtij subjekti politik. Haradinaj theksoi se Aleanca po tërheq mbështetje edhe nga ata që nuk kanë pasur më parë lidhje me këtë parti, duke e parë atë si zgjidhjen më të besueshme për të ardhmen e vendit. Ai u shpreh se qytetarët përballen me mungesë investimesh dhe zhvillimi, ndaj është e nevojshme një qasje e re qeverisëse për siguri, energji dhe zhvillim të gjithanshëm. Në përfundim, Haradinaj nënvizoi se Aleanca ka vetëm një pakt politik, atë me qytetarët e Kosovës, duke e vendosur bashkëpunimin me ta në qendër të programit të saj.