Eurodeputeti austriak Thomas Waitz ka ngritur në Parlamentin Evropian shqetësime lidhur me planet për ndërtimin e infrastrukturës së gazit fosil në Kosovë, pavarësisht mungesës së tregut, rrjetit shpërndarës dhe kapaciteteve të magazinimit në vend. Ai ka drejtuar pyetje Komisionit Evropian për mënyrën se si vlerësohen këto propozime në kontekstin e objektivave të Agjendës së Gjelbër dhe detyrimeve të Kosovës për energjinë dhe klimën. Waitz kërkon gjithashtu informacion mbi mbështetjen e Komisionit për debatin publik dhe planifikimin strategjik në vendet kandidate, duke theksuar rëndësinë e koherencës me tranzicionin energjetik dhe strategjitë kombëtare të energjisë. Kjo iniciativë vjen në një kohë kur diskutimet politike për gazin fosil po intensifikohen, duke sfiduar objektivat afatgjata të dekarbonizimit dhe promovimit të burimeve të ripërtëritshme.