Eurodeputeti austriak Thomas Waitz ka ngritur në Parlamentin Evropian shqetësime lidhur me planet për ndërtimin e infrastrukturës së gazit fosil në Kosovë, pavarësisht mungesës së tregut dhe kapaciteteve të nevojshme në vend. Ai ka drejtuar pyetje Komisionit Evropian për mënyrën se si vlerësohen këto propozime në kontekstin e objektivave të Agjendës së Gjelbër dhe detyrimeve për dekarbonizim. Waitz kërkon gjithashtu që investimet në energji të jenë në përputhje me strategjitë kombëtare dhe realitetin në terren, duke theksuar nevojën për koherencë me tranzicionin energjetik të BE-së. Ai kërkon mbështetje nga Komisioni Evropian për një debat publik të bazuar në fakte në vendet kandidate, ku diskutimet për gazin fosil po ndikojnë në politikën energjetike, pavarësisht synimeve për rritjen e burimeve të ripërtëritshme dhe uljen e emetimeve.