Në Kuvendin e Kosovës po shqyrtohet në lexim të parë Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme, i cili synon të luftojë pasurimin e pajustifikueshëm të zyrtarëve publikë. Ministrja e Drejtësisë, Donika Gërvalla, theksoi se ligji nuk cenon qytetarët e zakonshëm, por fokusohet në zyrtarët publikë dhe se Byroja nuk konfiskon, por mbledh dhe verifikon informacionin, ndërsa vendimin për konfiskim e merr gjykata. Projektligji ka kaluar në tri opinione të Komisionit të Venedikut dhe dy shqyrtime nga Gjykata Kushtetuese, e cila ka kërkuar respektimin e procedurave dhe parimeve kushtetuese. Nga ana tjetër, opozita, përfshirë PDK-në dhe LDK-në, shprehën rezerva për mungesën e konsultimeve publike, paqartësitë ligjore dhe nevojën për ndryshime për të garantuar drejtësi dhe pavarësi të Byrosë, duke paralajmëruar se do të votojnë kundër nëse vërejtjet nuk adresohen.