Komuna e Deçanit ka organizuar aktivitete të ndryshme për të shënuar 28-vjetorin e “Epopesë së Dukagjinit”, ngjarje që ka ndodhur më 24 mars 1998 në fshatin Gllogjan të Deçanit. Gjatë kësaj epopjeje, luftëtarët e Ushtrisë Çlirimtare të Kosovës i bënë ballë rrethimit nga forcat policore serbe, duke shënuar fillimin e përballjeve frontale në Zonën Operative të Dukagjinit. Përkujtimi i kësaj date përfshiu ekspozita nga nxënësit e shkollave fillore dhe një koncert klasik nga Universiteti “Haxhi Zeka”. Kjo ngjarje lidhet edhe me ndërhyrjen e NATO-s në Kosovë, e cila luajti një rol të rëndësishëm në përfundimin e luftës.