Gjatë këtij viti, rreth 11 mijë zyrtarë publikë në Kosovë kanë deklaruar pasurinë e tyre përmes sistemit elektronik, duke shënuar një rekord në numër. Megjithatë, 62 prej tyre janë gjobitur për vonesa në përmbushjen e këtij obligimi, ndërsa shtatë raste janë dërguar në Prokurori për mospërputhje në deklarime. Agjencia për Parandalimin e Korrupsionit (APK) ka theksuar se disa zyrtarë janë liruar nga përgjegjësia ligjore për arsye objektive, si qëndrimi në spital apo në ushtrime ushtarake, ndërsa për të tjerët janë shqiptuar masa disiplinore dhe gjoba që variojnë nga 250 deri në 500 euro. Bashkëpunimi me Prokurorinë është përmirësuar, por APK mbetet e pakënaqur me trajtimin e kallëzimeve penale, pasi shumë prej tyre hidhen për shkak të mosverifikimit të dashjes direkte në kryerjen e veprës penale.