Ushtruesja e Detyrës së Presidentes së Kosovës, Albulena Haxhiu, ka dekoruar Komitetin Norvegjez të Helsinkit me Medaljen Presidenciale të Meritave, duke njohur kontributin e tyre të rëndësishëm në mbështetjen e Kosovës. Ky komitet ishte ndër organizatat e para perëndimore që dokumentoi dhe ndërkombëtarizoi shkeljet e të drejtave të njeriut në Kosovë gjatë periudhës së luftës, duke ndihmuar që çështja e Kosovës të vihej në agjendën ndërkombëtare. Në takim me përfaqësuesit e Komitetit, Haxhiu theksoi gjithashtu mbështetjen e vazhdueshme që ky institucion i ka dhënë organizatave vendore dhe rolin e tij në përcjelljen e informatave për gjendjen në Kosovë te institucionet ndërkombëtare. Medalja Presidenciale e Meritave është një shprehje mirënjohjeje për angazhimin e gjatë dhe parimor të Komitetit në rrugën e Kosovës drejt lirisë dhe drejtësisë.