Edhe pse Kuvendi i Kosovës nuk zhvilloi asnjë seancë parlamentare për më shumë se një muaj për shkak të bllokimit në konstituim, 52 deputetë angazhuan ndihmës personalë që në ditët e para pas betimit. Kjo situatë i kushtoi buxhetit mbi 50 mijë euro vetëm për një muaj, ndërkohë që Kuvendi nuk kishte filluar punën zyrtare. Ekspertët e fushës e konsiderojnë këtë veprim joetik dhe të papërgjegjshëm, duke theksuar se angazhimi i stafit mbështetës duhet të ndodhë vetëm pas konstituimit të plotë të Kuvendit dhe fillimit të funksionimit të tij. Ata kërkojnë rregullime ligjore që të parandalojnë aktivizimin e pagave dhe benefiteve për deputetët dhe ndihmësit e tyre para se të fillojë puna institucionale.