Deputetët e Partisë Demokratike kanë bllokuar foltoren e Kuvendit, duke mos lejuar raportimin e Avokatit të Popullit, Endrit Shabani. Opozita pretendon se zgjedhja e Shabanit është bërë në shkelje të Kushtetutës dhe e akuzon atë si "ushtar partie" të Ramës, duke kërkuar që të largohet nga seanca. Kryetari i Kuvendit, Niko Peleshi, ka bërë thirrje të përsëritura për lirimin e foltores dhe vazhdimin e punimeve, por deputetët e opozitës kanë refuzuar, duke sjellë ndërprerje të vazhdueshme dhe pushime të shkurtra në seancë. Situata ka krijuar tensione të forta në sallë, duke penguar diskutimin dhe raportimin e planifikuar.