Deputetët e Partisë Demokratike të Kosovës dhe Aleancës janë mbledhur në sallën plenare të Kuvendit të Kosovës, duke i bërë thirrje kryesuesit Avni Dehari që të thërrasë seancën për konstituim. PDK-ja ka dërguar kërkesë zyrtare për vazhdimin e seancës me fillim nga ora 11:00, duke theksuar se moskonstituimi i Kuvendit brenda afateve ligjore po shkel Kushtetutën dhe aktgjykimet e Gjykatës Kushtetuese. Avni Dehari, deputet i Lëvizjes Vetëvendosje dhe kryesues i Kuvendit, ka bërë thirrje për dialog mes partive, duke paralajmëruar se vazhdimi i seancës pa marrëveshje mund të çojë në tensione dhe përplasje fizike brenda sallës. Ndërkohë, LDK-ja nuk është pjesë e mbledhjes, ndërsa pritet të ketë takime të mëtejshme mes partive për zhbllokimin e ngërçit politik që vazhdon prej zgjedhjeve të vitit 2025.