Deputetja e Lëvizjes Vetëvendosje, Arjeta Fejza, ka kërkuar publikisht arrestimin dhe paraburgosjen e gazetarit Milaim Zeka, duke e akuzuar atë për gënjeshtra në lidhje me përfshirjen e tij në një aktakuzë të Prokurorisë Speciale. Sipas Fejzës, Zeka ka manipuluar me origjinën e materialeve që i janë dorëzuar nga Fatmir Sheholli, i akuzuar për spiunazh në favor të Serbisë, duke pretenduar se ato ishin në gjuhën gjermane të GIZ-it, ndërkohë që materialet ishin në serbisht dhe kërkesa për përkthim ishte e paguar prej tij. Aktakuza përfshin Fatmir Shehollin, i cili akuzohet se ka marrë para për të siguruar materiale komprometuese ndaj zyrtarëve të Qeverisë së Kosovës dhe ia ka dorëzuar ato gazetarit Zeka, i cili më pas i ka publikuar në emisionin e tij para zgjedhjeve lokale. Zeka ka mohuar njohjen e origjinës së materialeve dhe pretendon se i ka kthyer paratë pasi ka mësuar nga Policia e Kosovës për përfshirjen e BIA-s serbe në këtë çështje.