Komisioni Ad-Hoc për përzgjedhjen e kandidatëve për anëtarë të Komisionit të Pavarur për Media nuk arriti të shqyrtojë listën e kandidatëve pasi administrata nuk finalizoi një listë të qartë me ata që i plotësojnë kushtet dhe ata që nuk i plotësojnë. Kryetari i komisionit, Alban Bajrami, njoftoi se do t’i japin kandidatëve mundësi të plotësojnë dokumentacionin deri të martën dhe se vendimet për kushtet do të merren në takimin e ardhshëm. Deputetët Ariana Musliu Shoshi dhe Time Kadrijaj kërkuan që lista e kandidatëve që plotësojnë kushtet të vjen nga Departamenti Ligjor, pasi sipas tyre nuk është detyrë e deputetëve të bëjnë këtë vlerësim. Pas diskutimeve, u vendos që komisioni vetë do të vendosë për secilin kandidat në mënyrë individuale, duke mos kërkuar më listë nga administrata, dhe se mbledhja e radhës do të mbahet të martën për të trajtuar këtë çështje.