Sot shënohet dhjetëvjetori i hyrjes në fuqi të Marrëveshjes për Stabilizim Asociim (MSA) ndërmjet Bashkimit Evropian dhe Kosovës, marrëveshje kjo që përfaqëson një hap të rëndësishëm në rrugën e integrimit evropian të Kosovës. MSA-ja, e nënshkruar më 27 tetor 2015 dhe ratifikuar nga Kuvendi i Kosovës, ka sjellë përfitime të shumta në fushat politike, ekonomike dhe legjislative, duke përmirësuar institucionet dhe mjedisin e biznesit në vend. Në aspektin politik, Kosova është angazhuar në zbatimin e reformave ambicioze për zhvillim politik, ekonomik dhe social, ndërsa BE-ja ofron mbështetje financiare dhe teknike për realizimin e këtyre reformave. Në fushën ekonomike, MSA-ja ka forcuar marrëdhëniet tregtare duke krijuar gradualisht një zonë tregtie të lirë mes Kosovës dhe BE-së, duke ndihmuar në zhvillimin e një ekonomie funksionale dhe konkurruese. Qeveria e Kosovës ka përcaktuar këto angazhime përmes Programit Kombëtar për Zbatimin e MSA-së, i cili synon përmbushjen e detyrimeve të marrëveshjes brenda afateve të përcaktuara.