Dhoma Ekonomike e Grave të Kosovës (G7) shpreh shqetësim për situatën aktuale politike në procesin e zgjedhjes së Presidentit të Republikës së Kosovës dhe bën thirrje për përgjegjësi nga të gjitha subjektet politike. Ajo thekson se në një periudhë sfidash ekonomike, përfshirë rritjen e kostove të energjisë dhe presione globale, vendi ka nevojë për stabilitet institucional dhe vendimmarrje të qëndrueshme, duke shmangur zgjedhjet e reja që do të rëndonin buxhetin e shtetit. G7 paralajmëron se pasiguria politike rrezikon stabilitetin ekonomik, funksionimin e institucioneve dhe sigurinë financiare të bizneseve, veçanërisht atyre në pronësi të grave dhe bizneseve familjare, të cilat janë më të cenueshme ndaj paqëndrueshmërisë. Në këtë kontekst, Dhoma bën thirrje për dialog dhe bashkëpunim politik për të siguruar funksionimin normal të institucioneve dhe për të mbrojtur interesin ekonomik dhe mirëqenien e qytetarëve.