Ministri i Punëve të Jashtme të Serbisë, Marko Gjuriq, zhvilloi një takim me Përfaqësuesin e Posaçëm të Bashkimit Evropian për dialogun ndërmjet Kosovës dhe Serbisë, Peter Sorensen. Gjatë bisedës u diskutuan zhvillimet në Kosovë dhe situata në rajon, me theks të veçantë në dialogun mes dy vendeve. Gjuriq theksoi përkushtimin e Beogradit ndaj këtij procesi dhe shprehu shpresën për krijimin e kushteve që do të mundësojnë rifillimin e dialogut në një nivel të lartë. Ai gjithashtu përmendi paqëndrueshmërinë politike shumëvjeçare në Prishtinë si një sfidë që duhet tejkaluar për të arritur progres.