Deputetët e VLEN-it theksuan rëndësinë e ndryshimeve në Kodin Zgjedhor si pjesë të Agjendës reformuese dhe afrimit të vendit me standardet evropiane. Bekim Qoku nënvizoi nevojën që procesi të mos kufizohet vetëm në aspekte teknike, por të përfshijë edhe zgjerimin e pjesëmarrjes demokratike, duke siguruar mundësi për qytetarët në diasporë që të votojnë në mënyrë të sigurt dhe transparente. Ai kritikoi bllokadat me mijëra amendamente, duke theksuar se qytetarët presin zgjidhje dhe reforma që përmirësojnë sistemin zgjedhor dhe jo pengesa. VLEN mbështet çdo zgjidhje që e bën procesin zgjedhor më të hapur dhe përfshirës, duke theksuar se diaspora duhet të jetë pjesë aktive e vendimmarrjes dhe jo vetëm burim remitencash.